बिलासपुर-अकलतरा के कारखाना-आफिस अउ घर म चलत हे जांच
बिलासपुर 8 फरवरी 2017। इनकम टैक्स विभाग के टीम ह आज बिलासपुर के दू बड़े ठेकेदार रामवतार अग्रवाल अउ पवन अग्रवाल मन के ठिकाना मन म छापा मारिस। ये दुनों भाई सड़क बनाए के ठेका लेथें। इमन पीडब्ल्यूडी म बड़का ठेका के संगें-संग डामर अउ लोहा के व्यवसाय घलोक करथें। इंखर व्यापार चारो-मुड़ा अड़बड़ फइले हवय।
आज रायपुर ले भिनसरहा अंदाजन 3 बजे इनकम टैक्स विभाग के साहेब मन पुलिस के टीम संग रवाना होईन। बिहनिया अंदाजन 6 बजे ले इंखर ठिकाना मन म छापामारी शुरू हो गीस। ए दुनों भाई मन घर म पहिली घलोक इनकम टैक्स विभाग के छापा पर गे हवय। अभी बिलासपुर, अकलतरा के संग अउ 9 जघा म इनकम टैक्स विभाग के कार्रवाई चलत हावय। अंदाजन 70 ले जादा इनकम टैक्स के साहेब मन ये कार्रवाई म लगे हावय। बताथें के दुनों ठेकेदार भाई मन के पावर प्लांट घलोक हावय। लोगन मन के कहना हवय के ये छापामारी ले अड़बड़ अकन टैक्स के देनदारी बहिराही। इनकम टैक्स विभाग के अधिकारी मन के कहना हे कि ये दूनों भाई मन के खिलाफ टैक्स चोरी के शिकायत बहुत दिन ले मिलत रहिस। अब छापा के पाछू गम मिलही के कतका के टैक्स चोरी करे गए हे।
